Mas pakamaayuhon ni Negros Occidental Vice Governor Jeffrey Ferrer nga hulaton na lamang ang pag-aprubar sang kasuguan nga nagatukod sa Negros Island Region (NIR) sang sa ginaduso nga pagtukod sang duha ka mga subregions.
Suno kay Ferrer magastohan lamang ang gobyerno kun ini ang ipaagi sa mga subregions.
Nagapati si Ferrer nga kun matukod ang subregions paagi sa Executive Order (EO), ini ang pagadulaon man sa ulihi kun mangin kasuguan na ang hagna nga nagatukod sa NIR.
Ini nga senaryo ang ginpaangid sang bise gobernador sa natabo man nga pag-abolish sang EO nga nagatukod sang NIR sang 2017.
Nagasalig si Ferrer nga magapangibabaw sa gihapon ang desisyon sang mayoriya sa isyu may kaangtanan sa liwat nga pagbuhi sang NIR.
Nagligad nga tuig, ginpahayag ni Bacolod City Mayor Alfredo “Albee” Benitez nga ginaduso sang Department of Budget and Management (DBM) kag National Economic and Development Authority (NEDA) ang pagtukod sang duha ka mga subregions samtang wala pa maaprobahan ang hagna nga nagatukod sa NIR.
Dugang pa ni Benitez nga ini ang pinakamadasig nga pamaagi agud masugdan ang operasyon sang Region 6A para sa Negros Occidental kag Bacolod City, kag Region 7A para sa Negros Oriental kag Siquijor. | Aksyon Marlon Genovea