VICTORIAS LGU NAGPAIN SANG 10M PARA SA KADALAG-AN FESTIVAL 2023

KAPULISAN MAY PERSON OF INTEREST NA SA PAGPATAY SA MAG-ILOY SA TALISAY CITY

Ginkumpirmar ni NOCPPO PIO P/Capt. Judesses Catalogo, nga may person of interest na ang mga kapulisan sang Talisay City PNP nga ginapatihan responsable sa pagpatay sa mag-iloy nga Epañola sa Hacienda road sang Hda. Ledesma, Brgy. Matab-ang, syudad sang Talisay tinalikdan nga Martes (Marso 28).

Suno kay Catalogo, matag-adlaw nga gina monitor ni NOCPPO Provincial Director PCol. Leo Pamittan ang kaso pagpatay sa mag-iloy matapos ginmanduan sini si PLt. Col Cenon Vargas nga tutukan kag solbaron ang kaso pagpatay kanday Sherly, Jason kag David Española, ang 8 ka tuig nga bata nga napatay samtang ginabulong sa Corazon  Locsin Montelibano Memorial Regional Hospital sadrong Huebes sang aga (Marso 30).

Hungod man nga wala ginhingadlan ni Catalogo ang ngalan sang person on interest bangod nagapadayon pa ang imbestigasyon. | Aksyon Alvin Grava

REKLAMO NGA MURDER GINPASAKA BATUK SA TATLO KA SUSPEK SA KINAGAMO SA MURCIA

Ginpasaka na ang murder complaint subong nga Sabado, batuk sa tatlo ka mga suspek nga sanday Marjune Gallano, Jojie Gallano, kag Venus Grace Catbagan lunsay residente sang Brgy Canlandog, banwa sang Murcia nga ginatudlo nga responsable sa kinagamo nga nagluntad sa Brgy Salvacion, banwa sang Murcia ala 1:10 sang aga, sang Byernes nga adlaw, Marso 31.

Suno kay Police Major Marc Joeil Reclamado, Chief of Police sang Murcia PNP nga kaupod man nga nagpadulong sa Hall of Justice ang pamilya sang mga biktima.

Ginkumpirmar ni Reclamado nga outpatient na sa karon ang isa ka pulis samtang yara pa sa ospital ang isa ka personnel kag estable na ang kondisyon samtang, ang isa ka sibilyan ang yara pa sa ospital kag estable naman ang medical status.

Nagpanugyan man ang hepe sa publiko nga kun mag-inom-inom dapat magsinadya lang kag likawan ang ginamo nga makaresulta sang krimen.

Nagpasiguro man si Reclamado sa pumuluyo nga padayon ang ila trabaho nga mapabilin ang kalinong kag katawhay sang banwa.

Sa piyhak nga bahin, maga-deploy man ang hepe sang mga police personnel sa mga lugar nga permi ginabisita sang turista sa maabot nga semana santa. | Aksyon Zil Menardo