Ginatun-an ni Senate Committee on Agriculture and Food Chairperson Cynthia Villar ang plano nga pagkakas sang responsibilidad sang Sugar Regulatory Administration ukon (SRA), sa implementasyon sang Sugar Industry Development Act ukon (SIDA).
Sa pagbisita ni Villar sa Associacion de Agricultores de La Carlota Y Pontevedra Inc. sa syudad sang La Carlota Negros Occidental subong nga adlaw, iya ginsiling nga luyag niya amendahan ang SIDA law kag magtukod sang National Sugar Program sa idalom sang Department of Agriculture nga amo ang magaimplementar sang SIDA.
Si Villar amo ang nagpamuno sa ginpatigayon nga hearing sang senado may kaangtanan sa kapaslawan sang SRA nga maimplementar ang SIDA.
Ini ang rason kun ngaa ginbuhinan sang Department of Budget and Management ang ginpain nga P2 bilyones pesos nga pondo, kag ginhimo na lamang nga P500 milyones pesos.
Samtang. nakigsapol si Villar sa mga sugar farmers sa syudad sang La Carlota Negros Occidental , may kaangtanan sa sitwasyon sang industriya sang kalamay.
Pila sa mga gintalakay sang senador, amo ang reklamo sang mga food processor angot sa mahal nga presyo sang kalamay ukon corn syrup.
Ang resulta sang dayalogo ni Villar ang kalakip sa pagatalakayon sa congressional hearing sa Enero 21 angot sa sugar industry.
Nagbisita man sa La Carlota si Department of Finance Assistant Secretary Antonio Joselito Lambino II. | Aksyon Marlon Genovea
