Naga panawagan si Vice Mayor El Cid Familiaran sa mga Locally Stranded Individuals nga naga paidalum sa home quarantine nga mangin responsable kag mag sunod sa mga polisa nga gin papanaug sang syudad.
Ini matapos ang report nga may mga LSI nga naga home quarantine pero makit-an sa mga pampubliko nga lugar apiesar nga wala pa nagwa ang resulta sang ila nga RT-PCR Test.
Suno kay Familiaran, chair sang Bacolod IATF, dapat mag buliganay ang syudad kag ang Barangay sa pakig-away kontra Covid-19 kag dapat ila man istrikto nga mamonitor ang mga LSIs.
Gin ehemplo ni Familiaran ang tikang nga gin himo ni Kapitan Rosinie Distrito sang Barangay Singcang-Airport nga iya gin pakuha ang tatlo ka mga LSIs kag gin saylo sa quarantine facility matapos nakit-an sang publiko nga nagwa bisan wala pa ang resulta sang ila swab test.
Nag panugyan si Familiaran sa mga LSIs nga mag sunod sa home quarantine protocol bangud ang ila pamilya ang ila una nga mahalitan kon mag bayolar kag may posibilidad man nga kondinahon ang mga ini sang ila kaingod balay. | Aksyon Dale Salazar
