Pormal nga nagpanumpa kay Negros Occidental Governor Bong Lacson sa Governors’ Office sa kapitolyo probinsiyal syudad sang Bacolod subong nga adlaw, si Atty. Emilio Bernardino “Dino” Yulo bilang bag-o nailiher nga kongresista sang ikalima nga distrito.
Si Yulo ang nagdaug sa boto nga 118,558 kontra sa kasumpong nga si Cong. Marilou Arroyo nga nakakuha lamang sang boto nga 76,115 nagligad nga eleksyon.
Suno kay Yulo nagakadapat lamang nga magpanumpa siya sa gobernador, bangud pila sa mga inisyatibo sang kongresista ang para man sa kaayohan sang probinsiya.
Nagasalig si Yulo nga mangin maayo ang iya relasyon sa gobyerno probinsiyal kag pumuluyo sang kinto distrito.
Si Yulo ang nagserbe bilang Board Member sang Sugar Regulatory Administration (SRA) umpisa Oktubre 27, 2017, antis magdesisyon sa pagkandidato bilang kongresista nagligad nga Mayo 9, 2022 nga eleksyon.
Siya ang nangin 5th District Provincial Board Member man sang Negros Occidental umpisa 2010 tubtub 2013, Bise Gobernador sang 2008 tubtub 2010, kag Provincial Board Members League of the Philippine Regional Chairman – Region VI sang 2007 tubtub 2008. | Aksyon Marlon Genovea
