BCPO, NAGTUKOD SANG DUHA KA GRUPO NGA MAGATUTOK SA KAMPANYA BATUK SA ILEGAL NGA DROGA

22 KA BARANGAY NAKASUMITER NA SANG DATUS SA NAGA OPERATE NGA E-BIKE

Ginpalawig ni Bacolod Mayor Albee Benitez ang deadline sa Mayo 20 sa pagsumiter sang datus sang mga Barangay angut sa naga operate nga e-bike, ginasuhestyon nga taripa kag rota sa ila nga nasakupan.

May 22 ka mga Barangay ang naka comply sa una nga deadline nga Mayo 15. Ini amo ang Barangays 18,12,13,14,16,17, 22, 34, 35, 36, 38, 40, Banago, Bata, Cabug, Estefania, Felisa, Handumanan, Granada , Pahanocoy, Vista Alegre kag Villamonte.

Ginpahayag ni Patrick Lacson, officer-in-charge sang Bacolod Traffic Authority Office, Biernes sang hapon, Mayo 17, sang nagsapol ang Alkalde sa mga Kapitan sa tuyo nga makabalay sang guidelines ang LGU sa pag operate sang e-bike.

Ini bilang pagsunod man sa DILG 2020 Memorandum Circular (MC) 2020-036 nga ginadilian ang mga triycles, pedicabs, kag motorized pedicabs nga mag operate sa national highways.

Ginpahayag ni Lacson, nga may QR code nga gina isyu ang LGU sa mga e-bikes nga legal nga maka operate.

Sa FB post ni Mayor Albee, umpisa Mayo 24, sarang nga dakpon sang BTAO ang e-bikes nga wala sang permit.

Para kay Lacson, luyag niya kuntane nga duha ka semana ang extension nga ihatag sa mga Barangay sa pag sumiter sang dokumento.

BTAO HEAD: TRAFFIC ENFORCERS PLANO NGA HIMUON NGA REGULAR NGA MGA EMPLEYADO

Ginpahayag ni BTAO Head Patrick Lacson nga gina plano ni Mayor Albee Benitez nga himuon nga mga regular employee sang syudad ang mga traffic enforcers kag pasakaan ang ila gina baton nga sweldo.

Nagalaom si Lacson nga matigayon ang gin palayag sa iya ni Benitez bangod aminado man si Lacson nga indi makasustiner ang 10-mil ka pesos nga gina baton nga sweldo sang mga traffic enforcers.

Ginaduso man ni Lacson kay Benitez nga hatagan sang libre nga vitamins ang mga traffic enforcers bilang bulig sa ila ikaayong lawas sini nga tuman ka init sang panahon pinaagi sa komitiba ni Councilor Claudio Jesus Puentevella.

95 porsyento sang mga traffic enforces ang lunsay mga JO ukon Job Order Employee.

Sa karon, suno kay Lacson gin hambalan na sya ni Benitez nga makig-angut na kay Atty. Carlos Ting sang City Legal Office kag sa opisina sang City Administrator agud tun-an kun papaano mapangitaan sang pondo nga idugang sa sweldo sang mga taga BTAO.