Narekober ang malapit tunga sa milyon ka pesos nga balor sang ginasuspetsuhan shabu sa buy bust operation sang Bacolod City Police Office-City Drugs Enforcement Unit (BCPO-CDEU) sa Purok Gabi, Barangay 4 syudad sang Bacolod.
Ang nadakpan ang ginkilala kay Eric Mugdan, 48 anyos, kag residente sang Barangay 4, syudad sang Bacolod.
Suno kay Police Lt. Joven Mogato, Team Leader sang CDEU, halos isa na ka semana nga ginabantayan sang mga otoridad si Mugdan.
Ang utod ni Mugdan ang ginatudlo sang kapulisan nga ginakuhaan sini sang supply sang ilegal nga droga.
Pagpahayag ni Mogato, wala maabtan sang kapulisan ang utod ni Mugdan sang ginkasa ang buy-bust operation.
Narekober sa buy-bust operation ang isa ka knot-tied kag 12 ka sachet sang ginasuspetsuhan shabu nga nagabug-at sang 63 gramos nga ginabulubanta nagabalor sang 420 mil (420,000) ka pesos; 1,150 pesos nga marked money kag proceeds kag kahita.
Si Mugdan ang ginakabig sang kapulisan nga high value individual.
Priso karun si Mugdan sa custodial facility sang Police Station 2 para sa nagakaigo nga disposisyon. | Aksyon John Diaz
