Ginkakas sa trabaho bilang Traffic Enforcer ang isa ka personnel sang Bacolod Traffic Management Office (BTAO) matapos nakuhaan sang litrato kag video ang pagbaton sang suhol halin sa isa ka violator sa bangga La Salle, syudad sang Bacolod.
Sa interview sa Aksyon Firingline, ginpahayag ni BTAO head Major Junji Liba nga wala na ginpabalik ang nasambit nga personnel bangod gin ako man sang natungdan nga nagbaton ini sang suhol.
Sa pagpangusisa ni Liba, duha ka enforcer ang nakit an sa video apang ang isa, wala sang ihibalo angot sa suhol nga ginbaton sang iya nga upod.
Ginklaro naman ni Liba nga ginatun an pa sini ang penalidad sa isa pa ka personnel matapos nga may salabton ini tungod wala nag isyu sang ticket sa nagpanuhol nga violator nga gin-report wala sang suksuk nga helmet.
Nagpabutyag man sang pagkadismaya si Liba matapos nadiskubre ang ginbaton nga suhol nga P50.00 nga suno sa BTAO head, ginbaylo gid sa trabaho.
Angot sini, liwat nagpahanumdom si Liba sa tanan nga Traffic Enforcer nga magaserbe ini nga leksyon agod indi na maghimo sa ano pa nga ilegal nga makaapekto sa trabaho ukon magresulta sang termination sa ubra. | Aksyon Ann Defensor-Lisay
