Patay ang isa ka kagawad sang ginluthang sa Sitio Kanungon, Barangay Puso banwa sang La Castellana, las 8:15 sang gab-e, Mierkoles (Mayo 1).
Ang biktima ang ginkilala kay Reynaldo Jacolbe, 48 anyos kag residente sang Sitio Tayubong, Barangay Puso sa banwa man sang La Castellana.
Suno kay Police Major Sherwin Fernandez, hepe sang La Castellana PNP, nagamaneho sang motorsiklo ang biktima sang ginluthang sang gin-aligar indi magnubo sa tatlo ka mga suspetsado.
Dugang pa ni Fernandez, madamo nga pilas sa lawas tuga sang pagluthang ang naangkon ni Jacolbe nga gintunaan sang iya kamatayon.
Narekober sa eksena sang krimen ang 10 ka basiyo sang naglupok nga bala sang 9mm revolver kag anum ka basiyo sang naglupok nga bala sang calibre 45.
Pagpahayag ni Fernandez, dako ang posibilidad nga madugay na nga ginplanuhan ang pagpatay kay Jacolbe.
ANO ANG POSIBLE MOTIBO?
Wala sang kontra sa politika kag personal si Kagawad Reynaldo Jacolbe.
Ini ang paglaragway sang iya mga kaupdanan sa barangay kay Jacolbe nga gintiro patay sang Mierkoles sang gab-e.
Suno kay Kagawad Ronnie Quiñala, first-termer si Jacolbe kag maalwan nga opisyal sang barangay.
Dugang pa ni Quiñala, wala man siya makabati nga may nagareklamo kontra kay Jacolbe.
Dugang pa, wala man si Jacolbe nagapanugid nga ini ang may pamahog sa kabuhi.
Sa pihak nga bahin, ginpahayag naman sang bata ni Jacolbe nga si Rizza Mae, 24 anyos, nga wala sila sang ideya sa motibo sa pagpatay sa iya amay.
Aminado si Rizza Mae nga kun aga lang nagatinir ang ila amay sa ila balay kag kun gab-e, didto ini nagatulog sa puluy-an sang iya ika-duha nga asawa.
Dugang pa ni Rizza Mae, madugay na nila ginahingyo ang ila amay nga untaton ang relasyon sini sa iban nga babaye agud makay-o ang ila nga pamilya.
Bangud sini, ginapaligban man ni Rizza Mae kun ano ang rasun sa pagpatay kay Jacolbe.
Samtang, ginpahayag ni La Castellana PNP Chief Police Major Sherwin Fernandez nga personal nga kaakig kag problema sa pamilya ang pila sa gina-usoy nga anggulo sang kapulisan sa nagapadayon nga imbestigasyon.