Nagapabilin ang panindugan ni Councilor Renecito Novero nga wala nagaupod sa proposal nga pagbalik sang limited face-to-face classes sa pungsod bangud sa pamahog sang Covid-19.
Sa nahibaluan, gin aprubahan na sang National IATF ang joint circular sang Department of Education kag DOH nha pagpatigayon sang limited physical classes sa mga lugar nga low-risk sa Covid-19. Para kay Novero, wala pa sang seguridad para masiguro ang safety sang mga kabataan kag manunudlo.
Suno sa Konsehal, para sa iya wala sang urgency ukon ginadalian ang pagbalik sang face-to-face classes.
Dugang pa ni Novero, dapat pangitaan nalang sang paagi nga mangin epektibo ang pagtudlo paagi sa blended learning instruction tubtob nga malab-ot ang herd immunity ukon mabakunahan ang mga estudyante kag mga manunudlo.
Samtang, ginpahayag ni Novero, nga indi ma apektuhan ang mga buluthuan sa Bacolod nga naga serbe nga quarantine facilities sa pag bukas sang klase sa maabot nga Setyembre 13.