Nag-isa ang Department of Social Welfare and Development (DSWD) kag Department of Labor and Employment (DOLE) Field Office VI, agud buligan ang mga pamilya nga apektado sang El Niño sa Western Visayas.
Ini paagi sa Project Local Adaptation to Water Access (LAWA) kag Breaking Insufficiency through Nutritious Harvest for the Impoverished (BINHI).
Ang partnership ginpatigayon sa initial meeting sang DSWD kag DOLE Region 6. Sa idalom sang amo nga programa, ang DOLE paagi sa Tulong Panghanapbuhay sa Ating Disadvantaged/Displaced Workers (TUPAD) Program, ang magapain sang P159.3 milyones pesos agud pondohan ang dugang nga 16,600 ka partner beneficiaries sa implementasyon sang Project LAWA kag BINHI.
Ang 16,600 ka mga partner beneficiaries ang hatagan sang nagakaigo nga resources sang DOLE, kag trabaho sa sulod sang 20 ka adlaw paagi sa Cash-for Work.
Samtang ang DSWD ang magahatag naman sang technical assistance sa project implementation.