Nakakuha sang kopya sang CCTV footage ang Isabela PNP sa lugar nga gin-agyan sang duha ka mga biktima sa shooting incident sa Sitio Galo, Brgy. 5 banwa sang Isabela kaina sang aga, Marso 28.
Suno kay Police Captain Arjay Dangarang, hepe sang Isabela PNP, nakita sa footage nga halin sa banwa sang La Castellana ang mga biktima kag padulong gid man sa Isabela ang ila nga direksyon.
Ang biktima nga nagasuksok sang blue nga t-shirt samtang angkas naman ang isa pa ka biktima nga nakasuksok sang puti nga t-shirt.
Patal nga pilas sa ulo ang naangkon sang duha ka mga biktima nga gintunaan sang ila kamatayon.
Samtang, wala naman makita sa footage nga may nagasunod sa mga biktima ukon posible mga suspek sa krimen.
Sa karun, ginahulat sang kapulisan nga may pamilya nga magpakig-angut sa ila kag mag-claim sang bangkay sang mga biktima. | Aksyon John Diaz
