Daku ang paglaom ni Governor Bong Lacson nga madamo sang mga Negrense nga atleta ang makahampang sa Palarong Pambansa sa syudad sang Cebu sa bulan sang Hulyo subong nga tuig.
Ini ang ginpahayag sang gobernador, samtang nagapadayon ang Western Visayas Regional Athletic Association Meet (WVRAA) sa syudad sang Bacolod.
Suno kay Lacson, may tsansa ang mga atleta sang Negros Occidental nga makuha ang kampeonato subong nga WVRAA kag makapartisipar sa Palarong Pambansa.
Dugang pa ni Lacson, personal siya nga nagalantaw sa pila ka mga hampang agud maghatag sang dugang nga inspirasyon sa mga atleta. Ang WVRAA nag-umpisa nagligad nga Mayo 2 kag magatapos sa Mayo 7.
Ang mga humalampang nga makakuha sang gold medal amo ang magapartisipar sa Palarong Pambansa, sa diin ang opening ceremonies sini ang patigayunon sa Hulyo 9 sa Cebu City Sports Center.
