Ginkumpirmar sang Negros Occidental Police Provincial Office (NOCPPO) nga may nagparekord sa Silay City PNP nga may gin-aligar gin-abduct sa Bacolod-Silay International Airport, sa syudad sang Silay sadtong Hulyo 22.
Suno kay Police Lt. Judesses Catalogo, Spokesperson sang NOCPPO, ang himata ang biktima ang personal nga nagpadangat sang reklamo sa kapulisan.
Apang suno kay Catalogo, wala pa maklaro kun sa diin sa airport gin-abduct ang biktima.
Dugang pa ni Catalogo, gina-usisa na karun sang kapulisan ang ini nga report.
Plano man sang kapulisan nga makakuha sang kopya sang cctv footages gikan sa airport agud makumpirmar ang natabo nga abduction.
Hibaluon man sang NOCPPO kun ngaa nadugayan ang Silay City PNP antis nakapatigayon sang imbestigasyon sa reklamo sang pamilya.
Ginmanduan ni BCPO City Dir. PCol. Thomas Joseph Martir si Police Capt. Elmer Bonilla, hepe sang Police Station 7 nga magpatigayon sang maid-id nga imbestigasyon sa sini nga kaso.
Nalakip sa mandu ni Martir, ang pagpatigayon sang nagakaigo nga koordinasyon sa mga kapulisan sa syudad sang Silay sa tuyo nga mausisa ang mga CCTV camera sa lugar nga una ginalegar gin abduct ang biktima.
Suno sa report sang Bacolod City Police Station 7, gin-aligar sang pamilya ni Alex Soberano nga Hulyo 22 sang ini ang gin-abduct sa airport kag Hulyo 31 sang nasapwan ang bangkay sini nga ginlubong sa duta sa Barangay Vista Alegre syudad sang Bacolod.