April 25, 2024
Maga isyu ang Bacolod City Legal Office sang show cause order kag 60 dias nga preventive suspension batuk sa kahera sang City Treasurer’s Office nga assign sa Bacolod Traffic Authority Office (BTAO).
Nag ugat ang reklamo matapos 1,300 pesos ang ginbayad sang traffic violator pero 300 pesos lamang ang nag sulod sa syudad.
Ginpahayag ni City Legal Officer Atty. Romeo Carlos Ting Jr., sa tion nga ma kompleto ang mga dokumento, maga isyu ang ila opisina sang show cause kag preventive suspensyon posible sa masumod nga semana.
Ginpahayag ni Ting, mabug-at ang offense nga pag tamper sang opisyal na resibo kag termination sa trabaho ang penalidad.
Suno kay Ting, nag isyu man si City Treasurer Arlene Memoria sang notice to explain sa ginareklamo nga kahera sa sulod sang 72 oras kag ang iya sabat ang ipaidalum sa evaluation sa pag isyu sang show cause kag preventive suspension.
Ginklaro ni Ting nga isa lamang ang kahera nga gin assign sa BTAO. Paathag pa ni Ting, nga dapat computerized ang balayran kag amount in words sa resibo magluwas kon wala sang internet.
Samtang, magapangayo ang City Legal Office sang kopya sang mga citation tickets nga na isyu sang BTAO kag ini ang usisaon kon bala naga match sa ginabayad sang violator sa City Treasurer’s Office.
Ginpahayag ni City Legal Officer Atty. Romeo Carlos Ting Jr., luyag nila mahibaluan kon bala isolated lamang ang reklamo ukon madamo na ini nga insidente.
Dugang pa ni Ting, ila man usisaon kon balay may iban pa nga imbolbado sa sini nga insidente.
Nagpanugyan si Ting sa mga traffic violators nga usisaon ang gina isyu nga resibo sang syudad.