KWESTYUNABLE NGA RESITA SA BAYAD AGAD PROGRAM, GINAUSISA

FAMILIARAN, PABOR SA STATUS QUO SA PUVMP

Pabor si Bacolod Vice Mayor El Cid Familiaran sang status quo tubtob nga ma solbar ang mga isyu nga ginapalambot sang mga transport group angut sa PUV Modernization Program.

Nagligad nga Martes, May 14, Si Familiaran ang nagsapol kay anay LTFRB Regional Director Richard Osmeña nga karon yara na sa nasyunal.

Sa amo nga pagsinapol, natabuan nga yara ang Cebu People’s Multipurpose Cooperative kag ang grupo ni Lilian Sembrano nga KNETCO-PISTON-NPTC nga nagpalambot sang ila mga concern sa programa sang gobyerno nasyunal.

Suno kay Familiaran, pabor siya sa status quo tubtob nga ma solbar ang mga isyu kag dapat may yara sang win-win solution ilabi na nga gina istoryahan dire ang palangabuhian sang iban nga tawo.

Para sa Bise-Alkalde, may yara sang ‘wisdom’ ang reklamo sang mga transport group kag dapat magpatunga dire ang gobyerno.

Suno kay Familiaran, lakip sa mga reklamo amo ang ginalegar wala sang assembly kag financial statement ang kooperatiba, ang pagwa sang iban nga brand sang modernized jeep nga mas barato ikomparar sa ginaduso sang Department of Transportation, kag ang pwede man lang maka individual sang sa nga magsulod sa korporasyon ukon kooperatiba.

Sa impormasyon ni Familiaran, may yara sang hearing ang kongreso sa pagpamuno ni Congressman Romeo Acop bilang chair sang Transportation nga komitiba. | VM Familiaran Photo/ FB

PROBINSYA NAKA RECORD SANG DUGANG NGA ISA KA PERTUSSIS CASE

Nakarekord sang isa ka bag-o nga kaso sang pertussis ang Negros Occidental.

Suno kay Provincial Administrator Atty. Rayfrando Diaz, ang pasyente nagaedad sang isa ka tuig sang Brgy. Guinhalaran syudad sang Silay nga naadmit sa hospital nagligad nga Mayo 5, apang nakagwa man sang Mayo 13.

Sa karon ang Negros Occidental ang may kabug-usan na nga 15 ka mga kompirmado nga kaso sang pertussis kalakip ang isa ka napatay.

Dugang ni Diaz, ginahulat sa gihapon sang Provincial Health Office (PHO) ang pag-abot sang 10,000 vials pentavalent vaccines nga ginbakal sang gobyerno probinsiyal.

Ini ang usaron para sa patigayunon nga catch-up vaccination sa mga kabataan nga nagaedad lima (5) ka tuig panubo, agud mapahagan hagan ang pertussis.