Ginpahayag ni Governor Eugenio Jose Lacson nga handa ang probinsya nga liwat magpatigayon sang presentation sa mga nagapamatok sa 1.2 billion pesos nga Negros Occidental Bulk Water Supply Project.
Sa interview sang media, Lunes, ginpahayag ni Lacson, nga napaidalum sa husto nga proseso ang ini nga proyekto kag gin imbitar man ang tanan.
Sa anum ka LGUs nga sakop ang Imbang kag Malogo River nga pagakuhaan sang surface water sang proyekto, ang Silay LGU na lamang ang wala makahatag sang resolution of no objection.
Suno sa Gobernador, handa ang probinsya nga mag presentar sang sini nga proyekto sa Silay ilabi na sa mga natungdan nga Barangay.
Ginadula naman sang gobernardo ang posibilidad nga magpasaka sang kaso sa mga nagapamatok.
Liwat nga ginpahayag ni Lacson nga tinutuyo sang proyekto nga mahatagan sang safe potable water ang mga pumuluyo.
Si Lacson ang magabyahe sa Bali, Indonesia subong nga semana nga isa sa mga guest speakers sa 10th World Water Forum.
Ginpahayag ni Lacson, iya ipabalo sa forum ang nabalay nga water security plan sang probinsya kag ang ginaduso nga bulk water project.
Samtang, ginasuhestyon ni Silay Mayor Joedith Gallego ang pagpatigayon sang public ukon Barangay consultation sa ila nga lugar sa ginaduso nga Bulk Water Supply Project.
Ginpahayag ni Gallego, iya ginatugyan sa Sangguniang Panlungsod ang pagsunod sang nagakaigo nga proseso lakip na ang public consultation kag pagtuon sa sini nga proyekto.
Suno sa alkalde, wala man sang opisyal nga sulat nga ginpadangat sa iya sa mga nagapamatok pero may mga grupo sang mga planters kag mangunguma ang nagapabutyag sang oposisyon sa proyekto.
Ginpahayag ni Gallego, nga wala karon sang problema sa suplay sang tubig ang Silay paagi man sa ila water utility nga Silay City Water District.
Sa nahibaluan, ang Imbang River kag Malogo River ang duha ka mga surface water nga pagakuhaan sang tubig sa sini nga proyekto. Ang duha ka mga suba ang nagalabay sa Victorias, Talisay, Silay kag E.B Magalona.
Nalakip sa plano ang pagtukod sang water treatment facility sa Barangay Guimbalaon, Silay kag sa Malogo sa E.B Magalona.
Una na nga ginpahayag ni Governor Lacson nga may nagakaigo nga pagtuon para kwaan sang tubig ang duha ka mga kasubaan.
Ginklaro ni BCPO Spokesperson Lt.Col Ronnie Brillo, nga wala sang pagbag-o sa schedule sang kapulisan kun police visibility patrol ang pagahambalan.
Suno kay Brillo, ang ginhimo nila nga precautionary measure agud malikawan nga may kapulisan nga mabiktima sang heat-related illnesses amu ang pagtugot sa kapulisan nga magsuksok sang patrol shirt samtang nagapatrolya.
Ginpahayag ni Brillo, apisar sang mainit nga panahon ginapasiguro nila nga mahimo sang kapulisan ang ila nga trabaho kag padayon nga ma serbisyohan ang mga pumuluyo.
Nagapasalamat na man ini nga wala sang kapulisan sa BCPO nga na-record nga nabiktima sang heat stroke ikon iban pa nga heat-related illnesses halin pa sang nag-umpisa ang El Nino Phenomenon.
