Patay ang mag-utod sa banwa sang Hinobaan matapos gin-alegar nga nahilo sa pagkaon sang “kumong-kumong ukon krukudlong”, nga isa sa mga sahi sang kasag.
Sa interview sang Aksyon Radyo Bacolod, ginpahayag ni Municipal Fisheries Program In-Charge Agriculturist II Jimmy Cambarijan, una nga ginbawian sang kabuhi sang mag-abot sa Hospital sang Hinobaan ang anom (6) ka tuig nga manghod, kag napatay man ang walo (8) ka tuig sini nga magulang.
Ginabulong naman sa ospital sa Bacolod ang amay nga si Bernard Floro kag iloy nga si Juvelet Magno, pati na ang kamagulangan sini nga babaye naga edad sang onse (11) anyos.
Suno kay Cambarijan, Marso 16 sang nanguha ang amay sa baybay sang amo nga sahi sang kasag, kag ginluto sang Marso 17 sang aga agud isud-an sa pamahaw.
Dugang pa ni Cambarijan, pagka-hapon ila nabaton ang report angot sa pagkahilo sang pamilya sa Sitio Bagtic Brgy. Bulwangan gani ila ginbuligan agud nga madala sa hospital.
Nagapati si Cambarijan nga nahilo ang mga biktima bangud ang “kumong-kumong ukon krukudlong” nga may ‘scientific name’ nga Zozymus aeneus, ang nalakip sa mga makahililo nga kasag sa Pilipinas. | Aksyon Marlon Genovea