Bangkay na sang nasapwan ang lawas sang 14 anyos nga dalagita sa Purok Francisco, Brgy Binubuhan, syudad sang Bago, Negros Occidental, las 6 sang aga, Enero 6.
Ang biktima ginkilala kay Jemeiah Rose Oliveros, Grade 8 student kag residente sang Hda. Dos Marias, Brgy. Ara-al, siyudad sang La Carlota.
Sa inisyal nga report sang kapulisan, Enero 1, las 11:30 sang aga sang nagbiya ang dalagita sa ila puluy-an agud kuhaon ang cellphone sa iya amay sa puloy-an ni Jessie Buenabeles apang wala na ini makapauli.
Naglabay ang biktima sa dalan malapit sa diin nasapwan ang iya bangkay sa katubohan nga nagahamyangon, suksok ang duag violet nga bayo nga nabutong paibabaw sa diin kitaon ang iya pribado nga parte sang lawas, wala na sang underwear kag yara na sa stage of decomposition.
Gina-usisa sang kapulisan ang anggulo nga posible ginhimuslan ang biktima antis ginpatay.
