April 26, 2024
Gina usisa sang law department sang Philippine Statistics Authority ang gin alegar pag isyu sang civil registrar sang syudad sang Bacolod sang birth certificate sa isa ka Chinese national.
Hwebes nga adlaw, Abril 25, 2024 sang nagpadulong ang tiglawas sang PSA sa Bacolod para magpangusisa.
Ginpahayag ni City Legal Officer Atty. Romeo Carlos Ting Jr., Barangay Sum-ag ang address sang foreign national kag naisyuhan sang birth certificate sang 2019.
Ginkumpirmar ni Ting, nga may isa man ka dumuluong ang na isyuhan man sang kaangay nga dokumento sa banwa sang Hinigaran.
Ginpahayag ni Ting nga maga kooperar sila sa imbestigasyon kag hulaton ang findings kag rekomendasyon sang PSA.
Ginpahayag naman ni City Registrar Atty. Hermilo Pa-oyon nga indi maka isyu ang registrar sang birth certificate sa mga foreign national magluwas na lamang kon dire sa pungsod sila nabun-ag.
Suno kay Pao-oyon, maga kooperar ini sa pagpangusisa kag magahulat man sang resulta halin sa PSA.
Ginpahayag ni Paoyon, sa tion nga matukiban nga illegal ang pagkuha sang birth certificate, ini ang ipa cancel sang PSA.
Ginpaathag ni Paoyon, iya gina panan-aw nga posible nalutsan lamang sila ilabi na nga ila gina isyu ang mga dokumento sa tion nga may mga supporting documents nga gina presentar ang aplikante.