Nagpadala na sang pormal nga sulat ang barangay council sang Barangay Pahanocoy sa LGU sa syudad sang Bacolod, DENR kag iban pa nga concerned agency para imbestigahan ang ginaalegar pagtampok sang duta sa punong kag suba nga yara sa kilid sang baybay sa barangay Pahanocoy.
Suno kay Kapitan Yolanda Bebing Noble, gilayon nga gin-aksyon sang barangay ang pangabay sang pumuluyo sang Purok Maghimulat, Gold Medal, Hanapbuhay, Masinadyahon, Punta Balas, Maghirupay, Mabinuligon kag Maninihon ang reklamo nga gin alegar pagtampok sang duta sa punong kag suba nga ginapanag-iyahan sang negosyante nga si Andres Tacolod.
Dugang pa ni Noble, sa nahisugtan nga resolusyon nga ginpirmahan sang mga barangay Officials, tinalikdan nga Setyembre 6, ila gin-endorso ang problema kay Bacolod City Mayor Albee Benitez, Department of Environment and Natural Resources kag iban pa dala ang pangabay nga imbestigahan para mahataga kasanagan kun may bayulasyon sa gina develop nga propedad ni Taculod.
Sa karon ginahulat na lamang ni Noble ang aksyon sang DENR, LGU kag iban pa. | Aksyon Alvin Grava
