Ginabulong karon sa San Carlos City Hospital ang 57 anyos nga babayi matapos ginluthang sang iya bayaw kag mga hinablos sa Barangay Dolis, banwa sang Calatrava, alas 8:30 kagab-i, Sabado (Abril 27).
Ang biktima ginkilala kay Emma Amolo samtang ang mga suspek ginkilala kanday Wilson Amolo, 62 anyos, Ceaser Amolo 56 anyos kag mga hinablos nga sanday Alec, Albert, Lary Boy Amolo kag Pepit Amolo, tanan residente sang amo nga lugar.
Sa inisyal nga pagpangusisa ni PCapt. Jesus Alba, DCOP sang Calatrava PNP, samtang nagapahuway ang biktima upod sa iya bana, ginaalegar ginsulong sang grupo ni Wilson Amolo ang ila puloy-an kag ginpaarakan lupok gamit ang wala mahibaluan nga kalibre sang armas.
Dugang pa ni Alba, sa amo nga insedente, nakaangkon sang pilas sa tiyan si Emma kag gilayon nga gindala sa ospital.
Sa hot porsuit operation sang mga kapulisan, tigayon nga nadakpan kaina sang aga, Domingo si Wilson Amolo samtang ang iban nakapalagyo matapos ang insidente.
Ginpahayag ni Alba nga away sa duta ang motibo sa pagluthang.
