Magatipon sang pondo ang gobyerno probinsiyal sang Negros Occidental para ibakal sang bakuna kontra Covid-19.
Ginpahayag ni Provincial Administrator Atty. Rayfrando Diaz II, ini nga pondo ang kuhaon sa savings sang personal services, maintenance and other operating expenses, kag mga programa kag proyekto nga nakanselar.
Suno kay Diaz ginhatagan na sang Provincial Accounting Office sang deadline nga una nga semana sang Pebrero 2021, ang mga departamento agud magsumiter sang report angot diri.
Matapos sini, pagasirad-an na ang libro sang gobyerno probinsyal agud madeterminar ang savings sang probinsiya.
Ginklaro ni Diaz nga may iban man nga source nga pwede kuhaan ang probinsiya agud idugang sa amo nga pondo.
Una diri, ginpahayag ni Interior Undersecretary Jonathan Malaya nga pwede makabakal ang mga LGUs sang ila kaugalingon nga suplay sang coronavirus vaccines, labi na ang mga wala malakip sa priority population sang vaccination program sang gobyerno nasyonal.
