GRADE 4 PUPIL, PATAY SANG MALUMOS SA BAYBAY SA TOBOSO
Posted by:
News Desk
|
April 28, 2024
at
3:57 pm
Share on facebook
Share on pinterest
Share on twitter
Share on print
Dead on Arrival na sa Toboso Rural Health Unit ang 10 anyos nga bata nga lalaki matapos nalumos sa baybayon sang Purok Maaswa, Barangay General Luna, banwa sang Toboso, Sabado (Abril 27).
Ang biktima isa ka Grade 4 student kag residente sang amo nga lugar.
Sa pagpangusisa ni PMaj. Jun Ray Batadlan, hepe sang Toboso PNP, alas 11 sang aga kahapon ulihi nga nakita ang bata nga nagapanyaga pa sa ila puloy-an apang alas 4:30 sang hapon nasapwan na lamang nga nagalutaw na sa higad sang baybay ginapatehan nga nalumos.
Ginpahayag man ni Batadlan nga nagaisahanon lamang ang biktima kag wala nagbabalo ang bata sa iya ginikanan nga malakat kag maligo sa baybay.
Magapangayo sang intervention si Councilor Claudio Jesus Puentevella sa Local Water Utilities Administration ukon LWUA nga ma review ang joint venture agreement sang Baciwa kag Primewater.
Ini ang tikang nga pagahimuon sang konsehal matapos ang committee hearing, Mayo 9, angut sa kakulang sang suplay kag pigaw nga kalidad sang tubig nga gintambungan sang mga tiglawas halin sa Baciwa, Primewater, Amlig Tubig, kag iban pa nga stakeholders.
Sa amo nga hearing, ginpresentar sang Baciwa-Primewater ang mga tikang nga ginahimo para mapaayo ang serbisyo sa Bacolod.
Sa datus, sa masobra 70 mil ka mga konsumedor, 43% lamang ang maserbisyuhan ini ang nagnubo bangud man sa epekto sang mainit nga panahon.
Ginpahayag ni Puentevella, chair sang committee on energy and public utilities, nga may yara guid man sang bayolasyon kag kakulangan sa JVA.
Suno sa Konsehal, may mga wala na comply sa kontrata kaangay sang nagakaigo nga suplay sang tubig pagkatapos sang duha ka tuig, dugang nga water sources kag iban pa.
Ginpalambot man sa konsehal, nga may mga bulk water supplier nga wala maka deliver.
Suno kay Puentevella, magahimo ini sang rekomendasyon kag natalana nga isumiter sa Sangguniang Panlungsod, lakip man ang pangabay sa LWUA nga mausisa ang JVA.
Ang LWUA ang isa ka government-owned and controlled corporation nga naga promote kag oversee sang water supply systems sa mga lugar sagwa sang Metro Manila.
Wala naman nagpa interview ang tiglawas sang Primewater nga magapagwa sang ila official statement.
AMLIG TUBIG, GINADUSO NGA ITUGYAN SA BACIWA ANG OPERASYON SANG WATER UTILITY
Ginaduso sang Amlig Tubig nga mabalik sa Bacolod City Water District ang pagdumala kag ownership sang water utility kag ma terminate ang joint venture agreement ukon JVA kaupod ang Primewater.
May pila ka mga nagtambong sa hearing nga nagpabutyag sang pagkadismaya bangud maayo man sadto ang suplay sang tubig sang ini ang yara pa sa BACIWA pero nagpigaw ang serbisyo sang nagsulod ang Primewater.
Ginpahayag ni Gamboa, kuntento sila sa resulta sang committee hearing kag ginatugyan na kay Mayor Albee Benitez ang paghatag solusyon sa sini nga mga problema.
Suno kay Gamboa, may puder ang Alkalde nga mag appoint sang bag-o nga board of directors kag ma revoke ang kontrata bangud sa mga bayolasyon.
Liwat nga ginpahayag ni Gamboa nga disbentaha ang kontrata para sa mga Bacolodnon.
Ginaduso ni Bacolod Councilor Celia Flor, chair sang committee on market, ang paghimo sang bag-o nga market code nga talamdan sa pagdumala sang mga merkado sa syudad sang Bacolod.
Ginpahayag ni Flor, outdated na ang existing nga market code sang syudad nga ginbalay pila na ka dekada ang nakaligad kag ginatun-an ang pag repeal sini kag paghimo sang bag-o nga ordinansa.
Nalakip sa market code, ang pagdumala sang Manokan Country. Suno kay Flor, sa bag-o nga market code, iga update ang sectioning sa mga merkado, ang kadakuon sang mga stalls kag iban pa.
Ginpahayag sang konsehal nga pasakaan man ang rate sa bag-o nga market code pero indi man pagpatam-an sang syudad bangud indi man negosyante ang LGU.
