Gin bulgar ni Jonah Abao, Market Supervisor sang Libertad Market, nga may pila ka mga market vendors nga naga plano nga indi mag pakigbahin sa swab testing program sang syudad para sa mga naga baligya sa merkado.
Sa interview sang Aksyon Firing Line, gin pahayag ni Abao, base sa iya impormasyon, may pila ka mga transient vendors nga nag sapol sa annex building sang Libertad Market subong nga adlaw kag naga plano nga indi mag intra sa swab test kag mag voluntary lockdown sang ila mga pwesto sa sulod sang 10 tubtob 15 ka adlaw.
Suno kay Abao, wala pa nakabaton sang final notice ukon memo ang mga market vendors gikan sa syudad angut sa petsa sa pagpatigayon sang swab test.
Dugang pa ni Abao, wala nadayun ang pag sinapol nga gin patawag sang syudad subong nga hapon, Hwebes, kasunod nga may gin kadtuan si IATF-Visayas Chief Implementer retired MGeneral Mel Feliciano.
Gin palayag man ni Abao, may pila man ka market vendors nga may ikasarang ang nag pa schedule sang swab test sa mga pribado nga laboratoryo.
Suno kay Abao, gin pasalig sila sang mga opisyal nga mag gwa ang resulta pagkatapos sang 24 oras.
Padayun sa karon ang data gathering sa mga market vendors nga nag kumpirmar nga mag paidalum sa swab test.
Suno kay Bacolod City Legal Officer Atty. Joselito Bayatan nga may yara sang atubangon nga konsekwensya ang mga vendors sa tatlo ka dalagko nga mga merkado sang syudad nga indi mag kooperar sa patigayunon nga mandatory swab testing.
Suno kay Bayatan, ang sin-o man nga vendor nga indi makapakigbahin sa amo nga programa ang temporaryo nga pauntaton ang ila operasyon sa merkado.
Gin klaro man sini nga gina himo lamang sang karon nga administrasyon ang naga kaigo nga tikang agud sa handum nga matapos na ang problema nga gina atubang sang syudad batuk sa kahalitan nga gin dulot sang COVID 19 nga pandemiya. | Aksyon Dale Salazar, Aksyon Art Tayhopon
