Tatlo sa 45 ka mga repatriated Negrense Overseas Filipino Workers ukon (OFWs), ang nagreklamo kag indi magpasugot nga dal-on sa Covid-19 Healing Center sa banwa sang EB Magalona, sang sila ang nag-abot sa Bredco Port syudad sang Bacolod subong nga adlaw, Mayo 20.
Suno kay Provincial Disaster Management Program Division Head Dr. Zeaphard Gerhart Caelian, luyag sang mga ini nga idiretso sa hotel agud magpaidalom sa mandatory quarantine.
Apang ginklaro ni Caelian nga protocol na sang Provincial Inter-Agency Task Force nga dal-on ang mga repatriated OFWs sa Healing Center para sa initial tests kag medical assessment antis sayluhon sa Go Hotel sa Bacolod sa koordinasyon sang Overseas Workers Welfare Administration.
Suno naman kay Gobernador Eugenio Jose Lacson, iya naintindihan ang balatyagon sang mga returning OFWs bangud luyag na sang mga ini nga makapauli agud makaupod ang pamilya, apang kinahanglan man mapasiguro sang probinsiya nga luwas ang mga ini sa peligro sang Covid-19. | Aksyon Marlon Genovea
