Maga serbe nga Midway Referral Facility ang gina tukod sang DPWH nga 32-room isolation facility sa Barangay Alijis, syudad sang Bacolod.
Sa interview sa Aksyon Hotline, gin pahayag ni City Administrator Em Ang, ang Midway Referral Facility ang maga serbe nga ’emergency room’ sa mga pasyente nga indi pa ma akomodar sang mga hospital.
Suno kay Ang, ang mga Covid mild cases ang iga isolate sa amo nga isolation facility kag sila ang sayluhon sa hospital sa tion nga mag moderate ukon severe ang ila nga kaso.
Si Mayor Evelio Leonardia ang una nga nag pangabay sa National IATF sang augmentation personnel para ma-address ang kakulang sang mga healthcare workers sa mga pribado nga hospital.
Suno sa Alkalde, ang Bacolod ang naga kinahanglan sang anum ka mga doctor para sa Midway Referral Facility, 288 ka mga nurses para sa emergency treatment center kag isolation facilities, 18 ka radiology technicians, 26 ka medical technologits, 24 ka respiratory therapists, kag 30 ka housekeeping staff.
Wala pa sang pat-od nga petsa sa pag bukas sang amo nga pasilidad.
Samtang, gin anunsyo ni Ang, nga ang syudad ang may duha man ka ‘step down’ facility para sa mga pasyente nga halin sa hospital nga kinahanglan pa nga mag mapaayo ukon mag tapos sang 14-day quarantine period sa tuyo nga ang ila nga hospital bed ang itugyan sa mas naga kinahanglan.
As of October 6, 2020, yara karon sa 71.50% ang critical care utilization rate sang mga public kag private hospital sa syudad. | Aksyon Dale Salazar