DILG: TANAN NGA LGUs SA REGION 6 NAG-COMPLY SA ROAD CLEARING OPERATIONS

KAHERA SA BTAO NGA GINAKUSAR NAG RETOKE SANG RESIBO, NAG RESIGN

Nag resign na ang kahera sang City Treasurer’s Office nga assign sa Bacolod Traffic Authority Office nga gin akusar nga nag retoke sang resibo sang traffic violator.

Sa press conference, ginpahayag ni City Legal Officer Atty. Romeo Carlos Ting Jr., nagligad nga Biernes, Abril 26, nag sumiter sang resignation ang regular nga empleyado.

Bangud sini, indi na mapatuman ang plano nga pag isyu sang show cause order kag preventive suspension batuk sa empleyado.

Suno kay Ting, base sa paathag nga ginsumiter sang kahera sa iya department head, nag brownout sang gin proseso ang bayad sang traffic violator rason nga iya ini gin ballpen.

Ginpahayag ni Ting, nga ginpanginwala man sang kahera ang mga alegasyon batuk sa iya.

Suno kay Ting, abswelto sa kaso administratibo ang kahera matapos nagresign.

Suno pa kay Ting, may dugang nga duha ka resibo nga ginakwestyon man sa karon batuk man sa gihapon sang kahera.

Pero ginakonsiderar ni Mayor Albee Benitez ang pagpasaka sang kaso kriminal batuk sa ginareklamo nga kahera.

DUGANG NGA IMBESTIGADOR MAGABULIG USISA SA KAMATAYON NI PSSG. ALACHA

Nagpadala sang dugang nga imbestigador ang Negros Occidental Police Provincial Office (NOCPPO) sa Sagay City PNP agud magbulig sa nagapadayon nga imbestigasyon sa kaso nga pagpatay kay Police Staff Sergeant Lernie Alacha sang Sabado (Abril 27).

Suno kay NOCPPO Spokesperson Police Captain Judesses Catalogo, nagdesisyon ang provincial command nga mag-augment sang personnel agud matutukan ang imbestigasyon kag mapadasig ang paghibalo sang matuod nga natabo.

Dugang pa, ginatinguhaan man karun nga mapadasig ang pagpagwa sang resulta sang paraffin test sa tatlo ka mga kaupdana ni Alacha.

Pagpahayag ni Catalogo, luyag sang PNP nga masunod ang nagakaigo nga proseso kag makapatuman sang maidid nga imbestigasyon antis maghatag sang tul-id nga imbestigasyon.

Samtang, ginakabig na nga persons of interest ang tatlo ka mga kaupdanan ni Police Staff Sergeant Lernie Alacha sang ini ang natiruhan kag napatay sadtong Sabado.

Suno kay Catalogo, ginpaidalom sa paraffin test ang tanan nga upod ni Alacha bilang ebidensya sa nagapadayon nga imbestigasyon.

Wala naman nagaduda ang PNP sa mga pahayag sang himata ni Alacha apang ila ginaklaro nga ginasunod lamang nila ang proseso.

Sa pihak nga bahin, ginklaro naman ni Catalogo nga ang DSWD ang makadesisyon karun kun dapat ipaidalom sa ila kustodiya ang pito (7) ka tuig nga bata.

Apang, sa inisyal nga report nga nabaton sang PNP, ginbalik ini sa paghinakop sang iya iloy.

May angut sini, ginaklaro ni Catalogo nga wala pa ginakabig nga suspetsado ang menor de edad nga bata sang biktima.

Nahibaloan, ginpahayag sang live-in partner ni Alacha nga si Irene Dayanan nga ang ila pito (7) ka tuig nga bata nga lalaki ang nakatiro sa pulis nga ginkamatay sini.