Mangin serbe nga ‘wake up call’ sa mga nagasupak sa health kag safety protocols sang gobyerno, ang ginhimo nga pagpalagyo sang duha ka mga locally stranded individuals (LSIs) sa quarantine facility sa eskuwelahan sang Rafael B. Lacson syudad sang Talisay nagligad nga semana.
Ini ang ginpahayag ni Mayor Neil Lizares sa official facebook page sang Talisay.
Suno sa alkalde, indi dapat pagtolerahon ang ginhimo sang duha nga pagsupak sa protocols, bangud nagbutang ini sa peligro sang mga residente sa syudad.
Gilayon man nga nadakpan ang duha kag ginbalik sa quarantine facility.
Ginpahayag ni City Administrator Atty. Jose Jonathan Ealdama, nga nakaguwa na ang mga ini sa quarantine facility, kag gintugutan nga makapauli sa ila puluy-an, matapos magnegatibo ang resulta sang ila Covid-19 RT-PCR tests.
Apang ginklaro ni Ealdama, nga ginapreparar na sang mga otoridad kag City Legal Office ang pagpasaka sang kaso sa City Prosecutors Office.
Marso 19, 2020 sang magpalagyo man ang isa ka PUM sa quarantine facility sa Mambukal Resort, apang nadakpan kag ginpasakaan sang kaso nga pagsupak sa RA 11332 ukon Mandatory Reporting of Notifiable Diseases and Health Events of Public Health Concern Act. | Aksyon Marlon Genovea
