Patay ang nagadumala sang Dalayapan Agrarian Reform Cooperative ukon DARCO matapos gin ambush sang gin alegar indi magnubo sa lima ka armado nga tawo las 5:40 sang aga, Mayo 4 sa Hacienda Dalayapan, Barangay Caduhaan, syudad sang Cadiz.
Ginkilala ang biktima sa kay Manalo Porre, 51anyos kag residente sa nasambit nga lugar.
Suno kay Lt. Col. Rocky Desear, hepe sang Cadiz PNP, nagapadayon ang imbestigasyon agod mahibaluan ang identity sang mga suspetsado.
Ginalantaw man sang kapulisan kon bala ang natabo may angot sa pagpatay man sa magulang sang biktima nga si Larry Porre nga gintiro man sa pareho nga lugar sa diin, New People’s Army ang nag ako sa krimen.
Naggwa sa imbestigasyon sang otoridad nga anay surrenderer ang biktima kag asset sang Philippine Army.
Narecover sang kapulisan ang mga basiyo ka bala sang M-16 armalite rifle kag basiyo sang kalibre 45 nga armas luthang.
Sa karon, padayun ang imbestigasyon sang kapulisan sa krimen. | Aksyon Ann Defensor