Patay ang 27 anyos nga lalaki matapos ginluthang samtang nagakatulog sa sulod sang balay sang iya live-in partner sa Purok Sigay, Barangay 2, syudad sang Bacolod Sabado sang gab-i, Disyembre 25, 2021.
Ginkilala ang biktima nga si Elmar Gayatin alyas John, nga naga katulog sang ginsulod sang suspek kag gintiro sang tatlo ka beses.
May igo ang biktima sa ulo kag sa liog sang gina suspetsuhan kalibre 45 nga armas luthang.
Ginpahayag ni Police Captain Paul Vincent Pendon, hepe sang Police Station 2, nag gwa ang live-in partner sang biktima nga si Aliza Barredo para mag paload pero ginpabalo na lamang nga gintiro na ang iya live-in partner.
Suno kay Pendon, ang biktima ang gin alegar drug surrenderer.
Sa pagpangusisa ni Pendon sa lugar, gin alegar nga ang biktima ang nagapangtunto ukon nagapanawas sang droga sa palibot.
Ginalantaw sang Police Station 2 nga isa ukon duha ang suspek sang krimen.
Suno kay Pendon, gin dungan sang suspek ang krimen samtang ang Barangay ang may Christmas tree lighting sagwa, kag wala nabatian ang lupok kasunod nga may nagalinupok man nga palupok.
Ginalantaw sang kapulisan nga droga ang isa sa mga angulo nga ginatutukan sa imbestigahan kag padayon pa nga ginapadalman ang krimen.