Gin desisyunan na sang syudad sang Bacolod nga sa Milan, Italy maga byahe ang mga MassKara Dancers sang Barangay Granada para mag perform sa Philippine Independence day celebration sa Hunyo 29 kag 30, 2024.
Ini sa pihak nga tatlo ang imbitasyon sa luwas sang pungsod para mag perform ang MassKara Dancers.
Ginpahayag ni Councilor Jason Villarosa, chair sang committee on tourism, damlag lang nagsapol sila ni Mayor Albee Benitez kag ginkasugtan nga sa Europe ang masunod nga byahe sang mga MassKara Dancers.
Suno kay Villarosa, nakapadulong naman sadto ang MassKara Dancers sa New York, USA kag sang Long Beach, California kasunod nga nagpadala man sila sang pormal nga imbitasyon.Ginpahayag sang Konsehal, ini ang una nga tion nga ang MassKara dancers ang maga perform sa Europa.
Sa bahin sang gasto sang syudad, ginpahayag ni Villarosa, nga magabulig ang PAGCOR kag wala sang gasto nga mahali sa LGU.
Magapabilin nga ang MassKara Dancers sang Barangay Granada nga defending champion ang ipadala sang LGU sa Europe.
Magapangayo sang intervention si Councilor Claudio Jesus Puentevella sa Local Water Utilities Administration ukon LWUA nga ma review ang joint venture agreement sang Baciwa kag Primewater.
Ini ang tikang nga pagahimuon sang konsehal matapos ang committee hearing, Mayo 9, angut sa kakulang sang suplay kag pigaw nga kalidad sang tubig nga gintambungan sang mga tiglawas halin sa Baciwa, Primewater, Amlig Tubig, kag iban pa nga stakeholders.
Sa amo nga hearing, ginpresentar sang Baciwa-Primewater ang mga tikang nga ginahimo para mapaayo ang serbisyo sa Bacolod.
Sa datus, sa masobra 70 mil ka mga konsumedor, 43% lamang ang maserbisyuhan ini ang nagnubo bangud man sa epekto sang mainit nga panahon.
Ginpahayag ni Puentevella, chair sang committee on energy and public utilities, nga may yara guid man sang bayolasyon kag kakulangan sa JVA.
Suno sa Konsehal, may mga wala na comply sa kontrata kaangay sang nagakaigo nga suplay sang tubig pagkatapos sang duha ka tuig, dugang nga water sources kag iban pa.
Ginpalambot man sa konsehal, nga may mga bulk water supplier nga wala maka deliver.
Suno kay Puentevella, magahimo ini sang rekomendasyon kag natalana nga isumiter sa Sangguniang Panlungsod, lakip man ang pangabay sa LWUA nga mausisa ang JVA.
Ang LWUA ang isa ka government-owned and controlled corporation nga naga promote kag oversee sang water supply systems sa mga lugar sagwa sang Metro Manila.
Wala naman nagpa interview ang tiglawas sang Primewater nga magapagwa sang ila official statement.
AMLIG TUBIG, GINADUSO NGA ITUGYAN SA BACIWA ANG OPERASYON SANG WATER UTILITY
Ginaduso sang Amlig Tubig nga mabalik sa Bacolod City Water District ang pagdumala kag ownership sang water utility kag ma terminate ang joint venture agreement ukon JVA kaupod ang Primewater.
May pila ka mga nagtambong sa hearing nga nagpabutyag sang pagkadismaya bangud maayo man sadto ang suplay sang tubig sang ini ang yara pa sa BACIWA pero nagpigaw ang serbisyo sang nagsulod ang Primewater.
Ginpahayag ni Gamboa, kuntento sila sa resulta sang committee hearing kag ginatugyan na kay Mayor Albee Benitez ang paghatag solusyon sa sini nga mga problema.
Suno kay Gamboa, may puder ang Alkalde nga mag appoint sang bag-o nga board of directors kag ma revoke ang kontrata bangud sa mga bayolasyon.
Liwat nga ginpahayag ni Gamboa nga disbentaha ang kontrata para sa mga Bacolodnon.
