Nag isyu ang Bacolod Permits and Licensing Office sang first notice of violation sa Tamera Plaza Inn, ang accommodation establishment nga natabuan sang basag kotse nga insidente sa isa nila ka costumer.
Suno kay City Legal Officer Atty. Romeo Carlos Ting Jr., iya ginpakadtuan ang lugar kag wala sang tawo sa amo nga establisamento.
Ginkumpirmar ni Ting, nga wala sang business permit 2024 ang establisamento kag 2022 pa ang ila nga record sa syudad.
Ginpahayag ni Ting sa tion nga maisyu ang second notice of violation kag indi maka comply, ipasira sang syudad ang accommodation establishment.
Naglambot man kay Ting ang impormasyon nga ginalegar wala na nagaoperate ang establisamento pero natukiban nga nagabaton sang customer matapos ang basag kotse nga insidente.
Sa nahibaluan, nabiktima sa insidente ang OFW nga si Diovanni Curt Cinco nga halin sila sa Boracay kag nagpahuway sa amo nga establisamento antes magabyahe kuntane padulong sa Dumaguete.
Nakuha ang tubtob 70 mil nga cash, kag importante nga mga IDs.
