Nangin mainit ang diskusyon sang Sangguniang Panlungsod sa Bacolod angut sa una gina duso nga resolusyon ni Councilor Wilson Gamboa Jr nga naga apilar kay Mayor Evelio Leonardia nga ikonsiderar ang pag usar sang available credit sa bangko sa pag tukod sang kaugalingon nga hospital sang syudad.
Sa interview sang Aksyon Radyo Bacolod, gin pahayag ni Councilor Renecito Novero, wala na aprubahan ang original nga resolution ni Gamboa bangud delikado ang gina duso sini nga pag usar sang gin loan sadto sang syudad nga 1.7 billion para sa pag tukod sang hospital.
Gin paathag ni Novero, indi na mausar ang 1.7 billion loan bangud na alokar na ini sa mga proyekto kag may yara na sang kontrata.
Si Novero ang nag presentar sang subsidiary motion nga naga pangabay sa City Mayor’s Office nga tun-an ang posibilidad nga pag tukod sang City Hospital gikan sa “available funds”.
Nag abstain naman si Councilor Dindo Ramos sa subsidiary motion bangud suno sa iya may yara na sang hagna nga gina duso si Congressman Greg Gasataya nga naga establisar sang Bacolod General Hospital kag may aprobado nga ordinansa nga gin author ni Councilor Al Victor Espino nga naga establisar sang primary healthcare facility sa syudad.
Gin paathag ni Novero, ang subsidiary motion ang gina propose bilang substitution sa original nga resolution.
Suno pa kay Novero, sa tion nga ma aprubahan ang subsidiary motion, ang original resolution ang madula na.
Samtang, gina abi-abi ni Councilor Wilson Gamboa Jr ang ‘correction’ ni Novero angut sa iya gin duso nga resolution.
Suno kay Gamboa, sa iya resolution gin islan lamang ang tinaga nga ‘available credit in bank’ sa ‘available funds’.
Para kay Gamboa, kon may mga legal impediment, naga pangabay ini kuntane nga tun-an ini sang City Mayor’s Office ukon City Legal Office sa tuyo nga malambot ang handum nga may kaugalingon nga hospital ang Bacolod.
Suno kay Gamboa, karon nga sitwasyon, gina hatagan sa karon prayoridad sang mga bangko ang mga health-related projects. | Aksyon Dale Salazar