Nagahulat si Bacolod City Mayor Evelio Leonardia sa iga-anunsiyo ni Presidente Rodrigo Duterte angot sa ipatuman nga quarantine measures sa syudad umpisa Hunyo 16.
Sa interview sa Aksyon Firing Line, ginpahayag ni Leonardia nga indi nila luyag pangunahan ang ano man nga desisyon sang gobyerno nasyunal agod may yara sang uniformity sa mga measure nga ipatuman.
Dugang pa ni Leonardia, may yara sang draft ang syudad angot sa mahimo ipatuman nga Post Community Quarantine apang ini tanan ang preparasyon pa lamang kag magadepende sa guidelines sang National IAFT.
Kaina sang hapon sang gin sapol ni Leonardia ang tanan nga Barangay Kapitan sa syudad angot sa mahimo pagdamo sang magapauli nga Locally Stranded Individuals kag Returning OFWs sa masunod nga inadlaw.
Suno sa alkalde, may direktiba na siya sa tanan nga kapitan nga i-activate ang Barangay Health Emergency Response Team ukon BHERT agod matutukan ang magapauli nga mga LSI kag returning OFWs.
Aminado si Leonardia nga kulangon ang quarantine facilities sa syudad kag dako ang tsansa nga kalabanan sa mga magapauli ang ipaidalom sa home quarantine.
Gindayaw naman ni Leonardia ang Bacolodnon tungod cautious na kag gilayon nga gina-report ang mga nagalapas sang quarantine measures.
Gindayaw man ni Leonardia ang apat ka punong barangay sa syudad angot sa madasig nga pag akto kag pagpatuman sang lockdown sa ila nasakupan nga lugar nga may narecord nga nagpositibo sa COVID-19.
Ang mga punong barangay ginabug-usan nanday Barangay Banago Captain Ricky Mijares, Barangay Villamonte Captain Romel Flores, Barangay Bata Captain Lito Abaring kag Barangay Alijis Captain Donny Dela Vega.
Ginpahayag sang alkalde nga indikasyon ini nga yara ang suporta sang tanan para sa ano man nga tikang nga himuon para sa ikaayo sang komunidad kag para malikawan ang paglapta sang virus. | Aksyon Ann Defensor
