LACSON GIN INSPECT ANG THERMAL SCANNER KAG SWAB-TESTING BOOTHS NGA GIN BUTANG SA AIRPORT

PROBLEMA KAG SOLUSYON SA KURYENTE GINTALAKAY SA POWER SUMMIT

Ginklaro ni Negros Occidental Governor Bong Lacson nga natumod na sang gobyerno probinsiyal ang mga problema may kaangtanan sa power situation sa probinsiya, kay ginapangitaan na lamang sang solusyon.

Sa Provincial Stakeholders’ Consultative Power Summit sa Sanctuario de La Salle syudad sang Bacolod, ginpahayag ni Lacson nga ginatinguhaan sang probinsiya kun paano malikawan ang mga unscheduled power interruptions, kag masolusyonan ang pagmahal sa ginakonsumo nga elektrisidad.

Gin-anunsyo sang gobernador ang Renewable Energy Week sa kada Mayo 20 tubtub 24 sang tuig, sa diin magapresentar sang ila plano ang mga financiers sa renewable energy providers.

Dugang pa ni Lacson, handa man nga mag-finance sa prpyekto may kaangtanan sa renewable energy ang Banco De Oro (BDO).

Una nga ginlansar sang gobyerno probinsiyal ang SecuRE Negros, isa ka multi-stakeholder-whole-of-society approach, nga maga-develop sang roadmap para sa renewable energy development sa probinsiya. | Capitol PIO Photos

PITO KA BUILDINGS SANG PROBINSYA PAHAMTANGAN SOLAR PHOTOVOLTAIC SYSTEM

Pahamtangan sang solar photovoltaic system ang pito (7) ka mga buildings nga ginapanag-iyahan sang gobyerno probinsiyal.

Ini ang ginpahayag ni Negros Occidental Governor Bong Lacson sa Provincial Stakeholders’ Consultative Power Summit sa Sanctuario de La Salle syudad sang Bacolod subong nga adlaw Mayo 3, 2024.

Suno kay Lacson, may public bidding na nga patigayunon sa masunod nga mga inadlaw para sa mangin supplier.

Ginklaro sang gobernador nga may separado nga investor nga maga-gasto sa amo nga proyekto, kag magabayad lamang ang gobyerno probinsiyal sang bulanan nga konsumo.

Pila sa mga buildings nga ginhingadlan sang gobernador, amo ang Provincial Capitol, Negros First Cyber Center, Negros Residences, kag Food and Terminal Market of Negros Occidental.

Ini ang kabahin sa handum sang probinsiya nga maangkon ang renewable energy bilang primary source sang electric power sa Negros Occidental.